Iraken kontrako berehalako eraso militarraren inguruko
albisteek sortutako egoera larriaren aurrean, herrialde horretako biztanleriarentzat
honek izan ditzakeen suntsipen eta heriotzen aldetiko ondorioak, eta mundu
mailako segurtasun ezaren nagusitasuna aurrikusita, agiri hau izenpetzen
dugunok, EHU/UPVeko irakasleak, ikerlariak, bekadunak eta AZPkoak, honako hau eman nahi
dugu aditzera
- Bushen administrazioak duen Iraken kontrako gerrarako planen, eta Aznaren
gobernua gai honetan izaten ari den menpeko jarreraren aurrean, gure aurkakotasunik
argiena utzi nahi dugu agerian.
- Gutariko askok Sadam Husseinen erregimenaren ekintzen aurkako jarrera
kritiko garbia defendatu dugu sarri askotan, bereziki, AEBek lagunduta, Iranen
kontrako gerratean eta kurduen aurkako erasoetan armamentu kimikoa erabili
zuenean.
- Aznaren gobernua egiten ari den argudio maltzurren erabilpenaren aurrean,
gerraren aurkako jarrera eta Sadam Husseinen diktaduraren aldekoa parekatuz,
gure erabateko ezadostasuna adierazi nahi dugu.
- Unibertsitate-komunitateko kideak garen aldetik, ideien gaineko eztabaida
librearekiko begirunea, eta gobernuak gai honetan duen iritziaren aurkako
jarrera kritikoak eta ahotsak isilarazteko egiten ari diren ahaleginen amaiera
exijitzen dugu.
- Gaur, inoiz baino gehiago, mundu zuzenago, solidarioago, eta demokratikoago
baten aldeko lana ezinbestekoa dela uste dugu, non Sadam Husseinena bezalako
erregimenik edo Bush administrazioaren politika gerrazalerik ez duten lekurik
izango.
Horregatik guztiagatik, giza eskubideen bortxaketa desberdinen
aurrean beste batzutan egin dugun legez, bat egin nahi dugu kultura, politika,
sindikalgintza eta bestelako alorren aldetik azken aldian gerra bidegabe
eta interesatu honen aurka altxatutako ahotsekin, eraso honek Irakeko herritarrei
konpondu ezinezko sufrimendu eta kalteak ekarriko dizkielako, horrekin batera
munduko herri eta nazioen arteko elkarbizitzaren narriadura sortuko duelarik.
Orri Nagusia
